शेकडो कार्यकर्त्यांनी केले उत्स्फूर्त स्वागत
बीड प्रतिनिधी भाजपच्या राष्ट्रीय सचिव पंकजाताई मुंडे यांची आज श्रीक्षेत्र हनुमान गड येथे अतिशय उत्साही वातावरणात वाजत गाजत पेढेतुला करण्यात आली. यावेळी शेकडो कार्यकर्त्यांसह भाविक भक्तांनी त्यांचे उत्स्फूर्त स्वागत केले.
पंकजाताई मुंडे यांनी काही दिवसापूर्वी कोरोना आजारावर यशस्वीपणे मात केली होती, त्यामुळे आज सावरगांवला भेट देण्यास जात असताना रस्त्यात श्रीक्षेत्र हनुमान गड येथे गडाचे मठाधिपती ह.भ.प. बुवा महाराज खाडे व बाळासाहेब खेडकर यांनी हनुमान गड येथे आग्रहाने पेढेतुला करत त्यांना उत्तम आरोग्यासाठी शुभेच्छा दिल्या. सुरवातीला गडाच्या कमानीपासून ते मंदिरापर्यंत पंकजाताई मुंडे यांची ढोल ताशांच्या निनादात वाजत गाजत मिरवणूक काढण्यात आली, यावेळी कार्यकर्ते व भाविक भक्तांनी जागोजागी रांगोळ्याची आरास व पुष्पमालांनी त्यांचे जोरदार स्वागत केले.
